ТӘҖРИБӘЛЕ КАРАШ

Арлан авылының күп функцияле үзәгендә урнашкан фельдшер-акушерлык пункты Арлан һәм Можары авыллары халкын хезмәтләндерә. Әмма ул вакытлыча фельдшерсыз калган – яшь медик армиягә киткән. Бүген аның вазифаларын Яңа Уразай фельдшер-акушерлык пункты фельдшеры Рима Локманова үти.

- Мин үзем Уразай фельдшер-акушерлык пунктында эшлим. Шулай килеп чыккач, вакытлыча бу участокны хезмәтләндерү дә миңа йөкләтелде. Көн аралаш барып йөрим. Яшь чагымда мин монда эшләгән идем инде, шуңа күрә кешеләрнең күбесен беләм, авыл советы да үзебезнеке. Авыр булмас, дип уйлыйм, - дип хәлләрен аңлата Рима Тимерхановна.

Эшнең күплеге аны куркытмый, чөнки 30 ел эчендә төрле шартларда эшләргә туры килгән аңа, тәҗрибәсе зур. Ярдәмчеләре - шәфкать туташы Лилия Хаматчина һәм санитарка Мария Хәтмуллина да ышанычлы кешеләр.

- Үземнең участокта мин берүзем генә эшлим, ярдәмчесез, шуңа күрә барлык мәсьәләләр дә, кар көрәүдән алып идән юуга кадәр, минем өстә. Ә монда минем ярдәмчеләрем бар, шуңа күрә үземнең медицина бурычларын гына үтим. Биредә шәфкать туташы да тәҗрибәле, күп нәрсәне үзе эшли, әмма кайбер процедуралар, мәсәлән, прививка ясау, фельдшерга гына рөхсәт ителә. Шуңа күрә андый эшләрне мин участокта булган чакка туры китерәбез. Документация эшләре дә күп вакытны ала, әмма барысына да өлгерергә тырышабыз, - ди Рима Тимерхановна.

Тагын да ул әлеге участоктагы эшләрнең үзенчәлекләрен билгеләде. Яңа Уразай участогында күпчелек пенсионерлар яши, ә аларны даими күзәтеп, тикшереп тору таләп ителә. Мәсәлән, кан басымнарын үлчәргә кирәк. Кайберләре белән чын күңелдән сөйләшү дә җитә.

Ә менә Арлан участогында яшәүчеләр төрле яшьтәгеләр, яшьләр дә күп. Шуңа күрә, Рима Тимерхановна әйтүенчә, анда эш үзенә башка кызыклы, «йомшарырга» ирек бирми – көн саен процедуралар, чакыру буенча өйләргә барырга да, балалар, инвалидлар янына йөрергә дә кирәк.

Без килгән көнне, мәсәлән, мәктәп укучылары прививка ясатырга килгән иде. Сәламәтлек торышларын тикшергәннән соң, фельдшер аларга прививка ясады. Шул чакта фельдшер өйгә чакыру алды - Арлан авылында яшәүче өлкән яшьтәге берәүнең хәле начарланып киткән.

Бу көнне фельдшер тагын яңа туган баланы карарга барырга тиеш иде. Быел Арлан авыл биләмәсендә беренче булып, 16 гыйнварда, кыз бала туган. Бүгенгә өч хатын йөклелек буенча исәптә тора. Әмма тагын артыр, дип ышаналар, чөнки Арлан һәм Можары авылларында ел саен 9-10 бала туа. Бу авылларда 2018 елда -14, 2019 елда 9 бала туган.

Бер өлешен фельдшер Рима Локманова үз өстенә алган менә шундый мәшәкатьләр белән яши бүген Арлан фельдшер-акушерлык пункты.

Читайте нас: