Кама таңнары
+11 °С
Болытлы
Барлык яңалыклар
җәмгыять
10 март 2020, 12:35

Римма Фабер: «Бер ишек ябык булса, икенчесе мотлак ачылачак»

Кемдер, хатын-кыз лидер була алмый, дияр. Тик биредә кешенең шәхси сыйфатлары зур роль уйный. Район Советы депу­таты, «Геркулес» үсмерләр клу­бы директоры Римма Фаберны күпләр белә. Битараф булмаган, эшлекле, кешеләрнең шатлыкла­рын да, кагыйларын да йөрәгенә якын алырга сәләтле кеше була­рак беләләр.

- Римма Вәгыйзовна, Сез ничек депу­тат булып киттегез?
- Декретта утырганда, минем янга еш кына күршеләр керә иде. Бер әби – түбәдән су ага, икенчесе – канализация тыгылды, өченчесе тагын нәрсәләр дип зарлана. Мин алар өчен инстанцияләр буенча йөри башладым. Халык моңа өйрәнеп китте. Бер заман Ольга Степ­кина миңа: «Барыбер кешеләргә ярдәм итеп йөрисең, депутатлыкка бар, ә без сиңа ярдәм итәрбез», - диде. Һәм менә икенче чакырылыш инде мин район Со­ветында депутат.
- Депутат булгач, әлеге эш турын­дагы күзаллауларыгыз чынбарлыкка туры килдеме?
- Дөресен әйткәндә, юк. Нәрсәгә дә булса ирешер өчен миңа кабинет­тан кабинетка йөрергә, кимсенергә, түбәнсенергә туры килде.
- Русиядә депутатларны яратып бетермиләр. «Мондый акчага мин дә башка бернәрсә дә эшләмәс идем» кебегрәк комментарийларны кабат­лап тормыйм.
- Районда депутат эше өчен акча түләнми. Җәмәгать башлангычын­да эшлибез. Ә депутатларны ярат­мауларына килгәндә… Мәскәү буен­ча бәялиләр. Андагы депутатларның хезмәт хаклары турында Интернеттан укыйлар да.
- Дөнья буенча органнарда эшләүче хатын-кызларның саны арта. Русия бу яктан калыша. Менә безнең район Со­ветында да ике генә хатын-кыз депу­тат. Сез ничек уйлыйсыз, нигә микән?
- Хатын-кызның эшчәнлегенә ир-атларның һәрберсе дә түзми. Ә ха­тын-кызлар үзләренә җаваплылык алырга һәм бер генә галстуклы ир-ат та булдыра алмаслык итеп ситуация­не үзгәртә алырга сәләтле.
Гомумән, хатын-кызлар бала тәрбияләп өйдә утырырга гына тиеш дигән традицион фикерләр әкренләп артта кала. Сәясәттәге хатын-кызлар­га килгәндә, гүзәл затларның депутат булып эшләүләрендә үзенчәлекле ка­рашлары - кеше проблемаларын хатын-кызларча кабул итүләре чагыла.
Хатын-кыз-депутат ниндидер мәгънәдә «зур әни». Ир-ат үзенең позициясен ниндидер рәсми мәгълүматларга, саннарга таянып якласа, хатын-кыз исә беренче чират­та теге яки бу карары аерым кешедә ничек чагылыр дип уйлый. Хатын-кыз-депутат - ул, иң беренче чиратта, хатын-кыз. Хәер, аның тагын икен­че ягы да бар. Төп эшне депутат эше белән бергә алып барырга, гаилә ту­рында да кайгыртырга кирәк.
- Советта ике төрле караш – ир-атлар һәм хатын-кызларныкы бу­ламы? Ир-ат-депутатлар Сезне аңламаган чаклар бармы?
- Бәхәсле мәсьәләләр туса да, без Рита Садыйкова белән ир-атларның карашларын үзгәртергә мәҗбүр итәбез. Бездә, гомумән, бик тату кол­лектив. Без эш буенча гына очрашмый­быз, бер-беребезне бәйрәмнәр белән дә котлыйбыз. «Синең территорияң, минем территория» дип беркайчан да бүлешмибез. Авыл биләмәсе депу­татлары белән элемтәне активлашты­рырга кирәк.
- Район халкын нинди мәсьәләләр борчый? Беренче чиратта хәл итәргә кирәкле мәсьәләләр нинди?
- Халык ярдәменнән башка безнең бернәрсә дә килеп чыкмас иде. Шуңа күрә безнең сайлаучыларыбыз про­блемаларын аңлатып, үзләре дә эшкә кушылырга тиеш. Асылда, депутатлар корпусы эше аша халык авыл белән идарә итүдә катнаша.
Минем сайлау участогында хәл ителмәгән проблемалар күп, һәм без аларны мөмкин булганча чишәргә ты­рышабыз. Мәсәлән, урман хуҗалыгы артында Монтажчылар урамында халык соравы буенча юл буена ка­нау ярдык. Халык үзе дә көрәк то­тып булышырга чыкты. Ел саен шул урам буйлап без грейдер белән үтәбез, ләкин файдасы юк, ком-таш булса да салырга кирәк.
Монтажчылар урамы баганаларын­да да бар җирдә дә ут юк. Макарен­ко урамын да яктырту таләп ителә. Яр урамында канализация үткәрү мәсьәләсен хәл итәсе бар. Комсо­мол урамында юл тауга таба менә, нәтиҗәдә яз көне су агып, кешеләрнең карбазларына су керә. Бу мәсьәләне дә ничектер хәл итәргә кирәк. Зенцов урамында чокырларны ямау таләп ителә. Ленин урамында, күпергә таба, тротуар кирәк. Ул участокта халык, ае­руча укучылар, күп йөри.
Иң зур бурыч - Монтажчылар ура­мында яшәүчеләрне иске йортлардан күчерү. 1нче һәм 3нче санлы йорт­лар авария хәлендәге йортлар дип санала. Чиратта - 4, 5, 8нче санлы йортлар. Иске һәм авария хәлендәге йортлардан күчерү программасы­на керер өчен биредә дә йортлар бу­енча җаваплы кешеләргә һәм йорт хуҗаларының үзләренә дә кыймыл­дарга кирәк. Монтажчылар тыкры­гында яшәүчеләрне күчерделәр инде.
Гомумән, мәсьәләләр хәл ителә һәм хәл ителәселәре дә күп. Аның өчен бюджеттан акча бүлүләре кирәк, әмма мин әкренләп барысы да эшләнер дип ышанам.
- Депутат эшчәнлеген «Геркулес» үсмерләр клубы директоры һәм әни, хатын булу эшләре белән бергә алып барасыз?
- Бөтереләм, барысына да өлгерергә тырышам. Кызым Валерия зур инде. Ул бик акыллы, бөтенрусия һәм халыкара форумнарда катнаша. Ул рэп укый, тек­стын да үзе яза, клиплар төшерә. Кызым кияүдә, ире белән Ташкиновода яшиләр. Икесе дә спортчы, Валериянең - туризм буенча беренче разряд, ире - спелеолог. Ә мине өемдә этем Гаврюша һәм песием Маруська көтә. Ирем вахта ысулы белән Себергә эшкә йөри. Буш вакытым бик юк дияргә була, килеп чыкканда, та­бигать кочагында ял итәргә тырыша­быз. Кызым белән киявем - чаңгыда, мин - чанада. Кичләрен бассейнга ак­вааэробикага йөрим. Әйткәндәй, анда да үземнең сайлаучыларым белән күрешәм, һәм алар миңа үзләрен бор­чыган сорауларын бирә. Депутатның эше төшке аш вакытында да дәвам итә. Җиңү, Зенцов, Ленин урамнары буйлап җәяү йөрим, кибетләргә керәм, халык белән аралашам.
- Сезнең яраткан мавыгуларыгыз нинди?
- Мин бакча карарга яратам. Бакча­чылык белән шөгыльләнермен дип беркайчан да уйламаган идем. Бакла­жан, борыч чәчтем дә инде. Әбиләр төрле үрентеләр, орлыклар белән тәэмин итә. Мәсәлән, Мичурин ура­мыннан Фәүзия апа миңа лалә суган­чаларын бирде. Мин җирдә чокыныр­га яратам икән. Хәтта помидорлар, чәчкәләр белән сөйләшәм.
- Сезнең тормыштагы девизыгыз нинди?
- Тырышкан табар, ташка кадар кагар. Тагын да: бер ишек ябык икән, икенчесе мотлак ачылачак. Минем «аның кара­вы» дигән тылсымлы сүзем бар. Берәр нинди төшенкелеккә бирелгәндә, ул миңа һәрвакыт ярдәм итә.
Марина Журомскас
Читайте нас: