Дөньядагы төче су запасы Җирдәге барлык су күләменең 3%ын гына тәшкил итә

Планетадагы су проблемаларына җәмәгатьчелек игътибарын тарту максатында, БМО Генераль Ассамблеясе Бөтендөнья су көнен 1993 елда игълан иткән.

Ә бит су проблемасы чынлап та бар, дөресрәге, эчәр су булмау яисә аның сыйфаты начар булудан җәфалана кеше. Аннары елга-күлләрнең чисталыгын да бик кайгыртып бармыйбыз. Үзебез шунда чүп-чар ташлыйбыз, яр буенда машина юучылар да юк түгел. Краннан аккан суны да сакчыл тота белмибез. Кайчак тикмәгә дә су агызабыз.

Әлеге көннең дә максаты - эчә торган суның җитмәвенә игътибарны арттыру, су ресурсларының кирәклеген раслау һәм аларны дөрес куллану.
Исәпләүләрдән күренгәнчә, 1 кешегә 1 тәүлеккә 500 л су сарыф ителә икән. 1 кг кәгазь ясау өчен 50-140 л, 1 кг күмер алу өчен 3-5 л, 1 кг корыч кою өчен 20-120 л, 1 кг дөге үстерү өчен 4000 л, 1 кг бодай үстерү өчен 900 л су кирәк икән.