Хыялларны тормышка ашыралар

Биш ел элек, ат үрчетә баш­лаганда, Хәмидуллиннарның крестьян-фермер хуҗалыгын булдыру турында уйлап та ка­рамаганнар, тормышка ашы­расы килгән балачак хыялла­ры гына булган.

- Атларны бала чактан ук яратам. Авылда хуҗалыкта атсыз булмый, безнеке дә бар иде, һәм мин аларны карарга, тәрбияләргә ярата идем. Ә атта чабу үзе бер бәхет. Мин шул чакта ук киләчәктә ат үрчетәчәкмен дип хыяллан­дым. Мөмкинлек барлыкка килү белән үк атлар сатып ала башладым, - дип сөйли Сала­ват Хәмидуллин.

Иренең башлангычын Эль­вера Баязитовна да хуплаган һәм гаиләнең бар көчләрен һәм мөмкинлекләрен үз эшләрен булдыруга юнәлтергә риза­лашкан. Хәмидуллиннарның ат үрчетү белән шөгыльләнү иде­ясен туганнары да хуплаган.

Шуңа күрә, үзләренә тиеш­ле пай җирләрен тиешенчә рәсмиләштергәннәр, анда атлар өчен лапас эшләгәннәр. Малларга су эчерер өчен уча­стокта кое казыганнар, тиздән ут та керткәннәр, һәм су белән тәэмин итү мәсьәләсен генера­тор ярдәмендә хәл иткәннәр. Мал азыгын да алар үзләре әзерли, моның өчен гаиләнең үз техникасы бар. Беренче атны сатып алганнан соң хуҗалыкта аларның саны 2019 елга 20 башка җиткән.

- Былтыр без крестьян-фермер хуҗалыгын төзү ту­рында уйлый башладык. Һәм апрельдә минем исемгә кре­стьян-фермер хуҗалыгын рәсмиләштердек. Шул чакта без, яңа ачылган КФХ буларак, «Агростартап» прграммасын­да катнаша алуыбызны белдек, һәм конкурста катнашу өчен документларыбызны тапшы­рырга булдык, - дип уртаклаш­ты Эльвера Хәмидуллина.

Һәм алар көннәр буе програм­ма таләпләрен һәм шартларын өйрәнгәннәр, җентекләп уй­лаганнар, бизнес-план һәм чыгымнар планын төзегәннәр, башка документацияне әзерләгәннәр. Диплом эше өстендә эшләгән кебек җитди шөгыльләнергә туры килгән. Һәм аның нәтиҗәсе булган – КФХ 1,5 млн сум грант откан. Әйткәндәй, фермерлар үзләре исәпләвенчә, җиңүләрендә хуҗалыкның базасы булуы зур роль уйнаган, чөнки акча эшне баштан башларга түгел, киңәер өчен генә таләп ителгән.

Ә грант акчасына башкорт токымлы атлар сатып алыр­га карар иткәннәр. Салават Фәимҗанович әлеге токым атларын үрчетүнең файдалы икәнлеген үз тәҗрибәсеннән чыгып белә – аларның ите дә, сөте дә күп чыга. Дөрес, нәкъ әлеге токым атларын сатып алыр өчен фермерларга күп көч салырга туры килә.

- Башкорт то­кымлы атларны сатуда табуы бик авыр икән. Аларны эзләп, күп районнарга барырга туры килде. Әлеге токым бетеп бара дигән сүзләрнең чынлыгына ышандым. Һәм төбәк башлыгы Радий Хәбировның бездә ат үрчетү белән шөгыльләнүне тергезү һәм нәкъ башкорт то­кымлы атларны үрчетү турын­да нигә күп сөйләвен аңладым. Бу малларны, чыннан да, по­пулярлаштырырга кирәк. Ә әлеге токым атларын үрчеткән фермерны Благовар районын­нан таптым. Һәм без аңардан 20 баш ат сатып алдык, - дип сөйли Салават Хәмидуллин.

Нәтиҗәдә, грант акчасының күпчелек өлеше – 1 млн 400 мең сум - нәкъ атлар сатып алуга тотылган. Калганына тагылма печән җыйгыч алган­нар – мал азыгы хәзерләгәндә бу техника бик кирәк. Ә трак­тор, чапкыч, печән кыскыч хуҗалыкта электән булган.

Атлар өчен фермерлар 800гә якын төргәк печән әзерләгән - кышка җитәргә тиеш, диләр. Атлар кыш көне дә көтүлектә йөри – тояклары белән тирән булмаган карны чокып, коры үлән белән туклана.

Башкорт токымлы атлар үзләренең дисци­плинасы белән таң кал­дыра – аларны көтүлеккә чыгарып җибәрәләр, алар аннан читкә китмиләр, һәм караңгы төшкәч, үзләре кире кайта.

Гомумән, Салават Хәмидуллин аңлатуынча, баш­корт токымлы атлар һәрвакыт көтүләре белән йөри, еракка китмиләр. Көтүнең «башлы­гы» бар, һәм куркыныч ту­ган очракта, ул бөтен көтүне оештыра. Хайван яисә кеше булсынмы, читләрне якын да китерми, танышлары гына якын килә ала.