Кама таңнары
+11 °С
Болытлы
Барлык яңалыклар
Мәдәният
12 март 2019, 13:02

Матур сүз – җан азыгы

Районда «Нәфис сүз» конкурсы үтте.

Үзәк район китапханәсендә «Яратам сине, тормыш!» өлкән яшьтәгеләр иҗаты фестивале кысаларында нәфис сүз осталарының район конкурсы үтте. Ул Башкортстанның 100 еллыгына һәм халык шагыйре Мостай Кәримнең 100 еллык юбилеена багышланды.
Конкурс «әдәби әсәр уку» һәм «автор башкаруындагы әдәби әсәр» номинацияләрендә үтте. Һәрбер катнашучы конкурска «Башкортстан – халыклар дуслыгы бишеге» дигән темага берәр номер тәкъдим итте. Конкурс положениесенә ярашлы, катнашучылар рус, татар, башкорт һәм мари телләрендә чыгыш ясадылар.
Рус телендә Арланнан Елена Сайтиева, район үзәгеннән Анна Бабуркина һәм Вера Фикс чыгыш ясадылар. Анна Прокопьевна турында аерым сөйлисе килә. Районда аны чын Укытучы, үз эшенең остасы буларак беләләр. Анна Прокопьевна рус һәм совет әдәбиятының күп кенә әсәрләрен яттан белә. Шуңа күрә аның белән сөйләшүе дә кызыклы. Минем сорауларымның күбесенә ул шигырь юллары белән җавап бирде.
Гөлчирә Төхвәтуллина өлкән буын арасында үткәрелгән район конкурсларының күбесендә катнаша. Әлеге конкурста ул башкорт телендә шагыйрь Рафаэль Сафинның «Торналар очканда» әсәрен укыды. Гөлчирә Кирамовна бу шигырьне тәрҗемә иткән һәм аны шулай ук рус телендә дә укыды.
Башкорт телендә шулай ук Иске Моштыдан Илүсә Хөсәенова, Саузбаштан Рәсилә Сәмигуллина һәм Мүзәктән Рәзинә Зиннәтова чыгыш ясадылар.
Яңа Кабан авылыннан Рәвия Миңнегалиева, Яңа Актанышбаштан Иниза Вәлиева, Иске Янъгеттән Дөлфинә Фәхразиева һәм Дилә Мусина татар телендә чыгыш ясадылар. Бу категориядә Иниза Вәлиеваны аерым билгелисе килә. Ул озак еллар китапханә мөдире булып эшләгән һәм күп кенә әсәрләрне яттан белә. Иниза Ахуновна шулай ук аларны сәнгатьле итеп укырга да ярата.
Никольскидан мари телендә чыгыш ясаган Людмила Зарипова сәхнәгә милли костюмда чыкты. Бу аның чыгышын тагын да чагурак һәм матуррак күрсәтте. Яңа Бурадан килгән Светлана Байдимирова да мари телендә чыгыш ясады.
Әлеге номинациядә Анна Бабуркина, Гөлчирә Төхвәтуллина, Иниза Вәлиева һәм Людмила Зарипова җиңүче булдылар.
Рус һәм башкорт телләрендә үзләренең шигырьләрен укучылар номинациясендә Татьяна Романенко белән Айсылу Березинага тиңнәр булмады. Нәкъ алар үз категорияләрендә җиңүче булды.
Ә татар телендә үз осталыкларын Куяннан Хәлүдә Бәдретдинова, Иске Моштыдан Динифә Сәлимова һәм Рәвия Миңнегалиева күрсәттеләр. Алар арасында Рәвия Миңнегалиева иң яхшысы дип табылды.
Үз номинацияләрендә беренче урынны алучыларга – җиңүче дипломнары, ә калганнарга катнашучы дипломнары һәм истәлекле бүләкләр тапшырылды.
Бәйрәмдә катнашучыларны район ветераннар советы рәисе Ольга Степкина һәм район мәгариф бүлеге начальнигы Эльвира Махатаева котладылар.
Читайте нас: