Кама таңнары
+12 °С
Болытлы
Барлык яңалыклар
Мәдәният
27 февраль 2020, 19:25

УКЫТУЧЫ ДА, АКТЁР ДА, ТАРИХЧЫ ДА

Экскурсияче безнең күзаллауда таныш түгел шәһәр, чит ил белән та­ныштырып йөрүче кеше ул. Әмма гомер иткән таныш җирләр дә кызыклы икән ул – районның тарих һәм туган якны өйрәнү музее экскурсо­воды Елена Некрасова мине шуңа ышандырды.

- Елена Викторовна, музей­да эшләячәгегез алдан билгеле идеме, әллә соң бу язмышның көтелмәгән борылышымы?
- Экскурсияче булачагымның төшемә кергәне дә юк иде. Мин Нефтекама нефть техникумын тәмамладым. Әнием абруйлы һәм акчалы һөнәр үзләштерүемне теләде. Әмма мине Троице-Ни­кольск храмы каршындагы музей­га экскурсияче итеп чакырдылар.
Бик кызыклыга күрдем эшемне. Николо-Березовкада туып, шу­шында яшәсәм дә, авыл тарихы белән нәкъ биредә таныша баш­ладым. Ә 2008 елда мин район музеена күчтем.
- Экскурсияченең сөйләме ма­тур һәм интонацияле булырга тиеш. Кешеләр алдында чыгыш ясавы куркыныч булмадымы?
- Балачакта мин нык оял­чан идем. Мине хәтта кибеткә җибәрмиләр иде, чөнки сатучы­дан нәрсәдер булса да сорарга оял­дым. Һәм мин кинәт экскурсияче булып киттем. Туганнарым моңа нык аптырады инде. Аның кара­вы бу эш миңа оялучанлыгымны җиңәргә ярдәм итте. Музейда кыч­кырып сөйләргә һәм матур сөйләм белән кешеләрне үзеңә каратыр­га өйрәтмиләр. Моңа эшли-эшли өйрәнәсең. Әмма берьюлы сөйләү һәм алга таба нәрсә әйтәчәгеңне истә тоту һәм шул ук вакытта үзеңә игътибарны җәлеп итү чын-чынлап авыр. Экскурсияче - ул укытучы да, актер да, тарихчы да.
- Халык алдында ничек басып торырга, экспонатларны ни­чек күрсәтергә, ничек киенергә кирәклеген өйрәтүче берәр этика бардыр бит инде сезнең эштә дә?
- Санкт-Петербургта «Нацраз­витие» дип аталган гуманитар милли тикшеренү институты бар, шунда музей белгечләрен хәзерлиләр. Интонация, сүз белән һәм сүзсез аралашу, ничек басып торырга, ничек күрсәтергә, нәрсә сөйләргә – боларның барысын да өйрәнәбез. Мәсәлән, экспонат­лар турында сөйләгәндә, бармак белән төртергә ярамый, моның өчен күрсәткеч таяк бар. Дөрес басып торуга килгәндә, экспонат янында торырга тиешбез, әмма аны капларга ярамый.
- Экскурсияләрдә йөргәндә мин музей хезмәткәренең сал­мак кына сөйләвен гел авыз ачып тыңлыйм. Кеше бөтен нечкәлекләрен дә белә кебек то­ела. Сез экскурсияләргә ничек әзерләнәсез?
- Мин берьюлы берничә эшне эшләргә тәки өйрәнәлмәдем. Тынлыкта укырга яратам, шуңа күрә зур материалларны өйгә алам. Мәсәлән, «Бөек Ватан су­гышы – халык батырлыгы» күргәзмәсе буенча мәгълүмат 30 биттә язылган. Барысын да истә калдырырга, ятларга кирәк.
Марина Журомскас
Тулы версиясен гәзиттән укыгыз.
Читайте нас: