Йөз сорауга җавап бирделәр

Уфада Башкортстан Республикасы төзелүенең 100 еллыгына багышланган Башкортстан тарихы һәм мәдәнияте буенча республика олимпиадасы үтте.

Юбилей олимпиадасына читтән торып үткәрелгән этапта – «Башкортстанның тарихы 100 сорауда» дистанцион викторинада иң күп баллар җыйган гомуми белем бирү учреждениеләре укучылары чакырылды.

Безнең район буенча Николо-Березовка, Яңа Кабан, Саузбаш авыллары мәктәпләреннән биш укучы Башкортстанны иң күп белүчеләр арасында булды.

Олимпиада барышында укучылар республиканың әйдәүче югары уку йортлары галимнәре алдында үзләренең проект-тикшеренү эшләрен яклады, һәм нәтиҗәдә Саузбаш мәктәбенең 8нче сыйныф укучылары Рәзил Хәйдәров һәм Радмир Яһүдин республика олимпиадасының «Башкортстан Республикасы» номинациясендә призер булдылар һәм БР Мәгариф министрлыгы дипломнары белән бүләкләнделәр.